فوتو: اۋىل شارۋاشىلىعى مينيسترلىگى
پرەزيدەنت ءىس باسقارماسىنا قاراستى «استانا 20» مەملەكەتتىك قورىنىڭ بەلسەندى قولداۋىمەن ساپالى كوشەت ماتەريالىن ءوسىرۋ جۇمىستارى جۇرگىزىلىپ جاتىر, كوشەت ماتەريالى – بولاشاقتا «اپورت» سورتىن وتىرعىزاتىن جاڭا باقتاردىڭ نەگىزىنە اينالماق.
2024 جىلى جوڭعار الاتاۋىنىڭ تاۋلى ايماقتارىنان سيۆەرس جابايى الماسىنىڭ تۇقىمدارى جينالىپ, ولار سەبىلىپ, كوشەت پيتومنيگى قۇرىلعان. 2025 جىلعى اقپاندا ساپالى كوشەتتەر دايىنداۋ ماقساتىندا 10 گەكتار القاپتا قىسقى كوزتاڭبا (وكۋليروۆكا) جۇمىستارى جۇرگىزىلگەن.
اۋىل شارۋاشىلىعى مينيسترلىگىنىڭ ءباسپاسوز قىزمەتىنىڭ مالىمدەۋىنشە ۆەدومستۆو وكىلدەرىنىڭ الماتى وبلىسىنا جۇمىس ساپارى اۋىل شارۋاشىلىعى ۆيتسە-ءمينيسترى ازات سۇلتانوۆتىڭ توراعالىعىمەن وتكىزىلگەن كەڭەسپەن اياقتالدى. كەڭەسكە سالالىق قۇرىلىمدار مەن عىلىمي قاۋىمداستىق وكىلدەرى قاتىسىپ, قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ «تالعار» وڭىرلىك فيليالى باسشىسىنىڭ ەسەبى تىڭدالدى. سونىمەن قاتار جوبانى ىسكە اسىرۋعا كەدەرگى كەلتىرىپ وتىرعان ماسەلەلەر تالقىلانىپ, ولاردى شەشۋدىڭ ناقتى جولدارى ايقىندالعان. ءتيىستى قۇرىلىمدارعا ناقتى تاپسىرمالار بەرىلدى.
ايتا كەتەلىك, 2027 جىلدىڭ سوڭىنا دەيىن 110 گەكتار باق وتىرعىزۋ كوزدەلىپ وتىر.
سونىمەن قاتار, «اپورت» الماسىن ۇلتتىق برەند رەتىندە كەڭىنەن ناسيحاتتاۋ جۇمىستارى جۇرگىزىلىپ جاتىر. ناقتى اتاعاندا, بيىل قىركۇيەكتە قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ پومولوگيالىق باعى بازاسىندا «باق كۇنى» شاراسى وتەدى.
سالا مينيسترلىگى تاراپىنان جول كارتاسىن ىسكە اسىرۋ شەڭبەرىندە جوبانىڭ عىلىمي نەگىزى مەن ساباقتاستىعىن جانە ورنىقتى دامۋىن قامتاماسىز ەتۋ جالعاسا بەرمەك.
